Chinland Club Member pawl sin biacah
Ramkip um mi riantuan pi hawile hna, atulio kan vawlei thawngpang he dam in nan um cio lai tiah nan kut kan tlaih hna. Vawleicung miphun tampi lak ah Chin miphun tiah kan um ve, vawleicung ram vialte ah hin kawlram hi sifak bik kan si, kawl ram chung hmanh ah Chin miphun hi sifak bik kan si. Sifak bik miphun ah hin dothlennak tuah hi cu a fawi cio lo. A sifak mi miphun ah cun mah pawkhimnak cio lawng in khua ruat khomi kan si hna. Uknak chia taktak tang ah caan saupi kan um tikah fimthiamnak ngei kan tlawm, kan thin a tawi, kan hak a kau, mizawn kan ruat kholo, mi kan hnahchuah, mah thangthat duhnak a tam, hi vialte chung in dothlennak tuah hi a tih in an tih mi a si, a huat in an huatmi a si.
Dothlennak tuah cu a tha tuk mi a si ti cu theih cio a si, hi a tha ko mi ah hin zawnruahnak zong thapeknak zong an thei kholo. Kan sifah le kan lungretheih lung in biaknak lei bu then ah kan buai, bu hme te chung ah kan hngangam, ramchung ah cun biaknak lei bu then pin ah peng le tlang bu kong ah kan buai rih. Cu chapchap ah, Party Politics ah an buai hoi, hi tluk buaimi miphun ah rian na tuan tik ah na lungre a theih lai ning hi cu a fiang cia ko. Hawi tuah ngam lo mi a tuahmi kan si i zei ti awk tha, hawi nih tihmi hawi nih tuah ngam lo mi a tuahmi nan si, a dikmi rian kan tuan, pathian rian zong kan tuan chih, ngamh bu te le ralthate tu in tuan ko usih.
CNF/A hi kum sawmthum le kumhnih kan kal cang, kan thil ti khawh mi vialte cu kanmah ti khawh tawk cio in kan i zuam ko. Hi chung ah hi bantuk riantuannak ah nan rak i tel cio i, nan i zuamnak cio ah khuazing nih lam a kan hruai ko. Kan miphun zong duhsah duhsah in an mit a au thluahmah ko. Hi vialte hi nanmah hna zuamnak a si. Upatnak zong kan pek hna i a lawmh zong kai lawm. Covid lio a si ko bu in tulio zong rian kan tuan ko, Hakha, Thantlang bukip Pastor le hruaitu kan tonkhawh dih cang hna. Biaknak lei riantuantu vialte zong ruahnak leng pi in an hmurka a tha. Hakha, Thantlang ah cun, sangkip ah mino bu (CNF volunteer mino bu) an dir i Peace Fund an kan lak piak thluahmah ko. Mino hna zoh tik ah lung a hmui khun, lung zong a thawng khun.. July zerhthumnak ah, Hakha, Thantlang bu kip Pastor sawmli leng Camp Victoria ah an rak phan. Nihnih chung, kan Chairman Pu Zing Cung, Patron Pu Thomas Thang Nawl le kan AGS II Pu Htet Ni he duhtawk biaruahnak kan ngei kho hna, kan lung a hmui ngaingai. Kan tan khawhnak cio in kan tang lai ti a si cang. Hakha, Thantlang lailei khuate vialte zong Peace Fund ah an thawh thluahmah ko cang. Kan ram Paletwah ram kong cu nan theih, a herh ning in kan cawlcang thluahmah ko. Minung thazaang kan karh chin lengmang ko. Kan miphun ah thathawhnak a chuak chin lengmang. Ram leng zong ah mino hna hi tampi hmanthiam le kalpi thiam hna usih. Ramleng hi nan rian lak ah nan har deuh ngai lai, nan pasalnak cu a lang thluahmah ko. A ka kip in a zeilei poah in kan in bochan ve hna. Nangzong cu hlan na tuanmi a let in thazaang rak chuah chin law ti hi kan duh pi ko hna.
Chankhat chuah kan miphun hi hnu kan tawlh lailo, hmai norh tu in kan kal chin lai, ralthat le lungthawn le riantuan tu a biapi. Chimrel caan si tilo, tuan caan si ko. Ram chung zong ah tuan uh, thawh uh, ti hi kan kal pi cuahmah ko cang. Kan camp Victoria zong ah Camp Victoria Development Program in nifate upa in ngakchia tiang kan tuan dih. Naypyidaw lei ah Peace Talk lei in a nam mi kan pu le zong dinlo in an tuan ve, an nam ve. Kan miphun pi in kan umnak cio in kan ti khawh tawk cio kan cawl ah cun a ho nih dah an kan celh lai, kuttlaih bu in hmai lei ah fong chin ko usih.
Colonel Solomon
Secretary
Public Relations Department