Thazaang Kan Ser
A voi 7nak CNF Tonpumhnak nih ‘Thazaang (Minung, Hriam, Chawva) Sersiam’ dingin biachahnak a tuah. Lairel Bu (CC) le Tawlrel Bu (CEC) nih rian cu kan thlak. COVID-19 nih a kan den ve i kan duhning in kan cawl kho lo. Sihmanhsehlaw, bia kan khiahmi cu kan ttuanchuah khawh nakhnga kan i zuam i a si khawh chung in kan ttuan. Rian kan tuannak tete cu a tawinak in kan van langhter lai.
Party Cadre Training
A Voi 7nak CNF Tonpumhnak nih thazaang sersiam dingin bia a chahmi cu kan ttuanchuah khawh nakhnga tiah Party chungah hram tha tein kan thlak a hau kan ti i September 1-20, 2020 ah ‘Party Cadre Training’ cu kan tuah. Ramchung Regional Committee (RC) le party chungtel dangdang kha kan sawm hna i cawnpiaknak kan ngei. Hakha, Thantlang, Paletwa, Matupi, Midat tbk. in peng kip in minung 30 leng an kai kho. Chin State chung peng kip le Sagaing, Magwe, Rakhine, Yangon, Mandalay tbk. ummi Chin miphun umnak khua kip ah Party tha tein kan ser khawh nakhnga kan zuam cuahmah. Ramchung ah RC 17 kan ser cang nain RC pawl nunhter le khuate tiang ser khawh dingin zuam rih a hau.
Ralkap Sersiamnak
Chin Miphun Ralkap (CNA) kha, A Voi 7nak CNF Tonpumh biachahnak kan tuah bantuk in, ningcang tein thithruai kho mi ralkap si ding le Chinram a runven kho mi thazaang ngeih dingin Lairel Bu le Tawlrel Bu nih saduh kan that. Cucaah, ralbawi cawnnak a ngeimi nih hun kan hruai hna seh tiah Lairel Bu nih rian khinhnak le tuanvo peknak a tuah. CNA kha War Office (WO), Brigade 1, Brigade 2, Brigade 3, Brigade 4 tiin kan ser. CNA sersiamnak ah bawmhchanh dingin Ralbawi hlun pawl le Tawlrel Bu upa cheukhat fonh in Military Council (MC) kan ser. CNA kan sining kha a hram in kan coih i a thar in khuaruahnak, rian thlaknak, rian phawtnak le rian zohfelnak kan tuah. MC upa nih WO ah siseh, Brigade pawl ah siseh, kan umpi hna i cawnpiaknak, ceihhmainak, le zohfelnak kan tuahpi hna. WO le Brigade pawl zong nih an naule kha cawnpiaknak le zohfelnak an tuahpi ve hna. Cun, kan area chung i khuabawi pawl he biaruahnak zong kan ngei kho. COVID-19 ruangah kan rak timhmi thil dangdang pawl kan tuah khawh lo mi an umpah len. Asinain, tuah awk a thami paoh cu kan tuan cuahmah.
Ramleng RC/CC Tonpumhnak
COVID-19 ruangah Zoom Tonnak cu CNF zong nih kan hman ve cang. Ramleng RC/CC Tonnak voi thum kan tuah kho. US RC, Norway RC, Denmark RC, New Zealand RC, Australia RC, Malaysia RC tbk. in ram pakhat cio in RC Tonnak pawl tuah a si. COVID lio pi a si nain Ramleng RC pawl cawlcanghnak a that i chambau lo tein kan kal kho. Cu pin ah, UCCF, Inn saknak le a dangdang caah fakpi in nan cawlcangh kho. COVID hnu ahcun fak deuh in ttuan a hau te lai.
Mipi Pehtlaihnak: UCCF/Peace Fund/Adangdang
Department of Public Relations hruainak in Hakha le Thantlang ah cawlcanghnak nganpi kan tuah kho. Khrihfabu, Mino le Khuakip ah thanghnak a um. UCCF caah, Peace Fund caah le a dangdang caah tiin an tel cio. Mino phu kha sangkip ah kan ser, mino cawlcanghnak in facang, chiti tbk. tam ngai a chuak.
Mipi Pehtlaihnak: Ruahpumhnak
Chin miphun thazaang funnak caah Camp Victoria ah peng/khua kip in pastor le mino pawl kha auh in Chinram le Chin miphun sernak kha biatak tein kan cawnpiak hna. VCM 2 Dr. Lian Hmung Sakhong nih ‘Chin Nation-building,’ VCM 3 Dr. Sui Khar nih ‘Chin National Security,’ GS Salai Thla Hei nih ‘Strategic Thinking le CNF Bilateral Agreements,’ AGS 1 Salai Ram Kulh Cung nih ‘Ethnic Armed Resistance Organizations,’ AGS 2 Salai Thet Ni nih ‘About CNF le Chin Armed Revolution,’ AGS 3 Pu Ral Hnin nih ‘About CNF,’ Col. Solomon nih ‘National Unity’ tiin kan chimh hna.
| No. | A Voi | Nithla | Peng/Tlang | Khua | Pastor/Mino | Nu | Pa | Dihlak |
| 1. | A Voi 1nak | 20-22/09/2020 | Hakha | Hakha | Mino | 14 | 47 | 61 |
| 2. | A Voi 2nak | 06-08/10/2020 | Hakha | Hakha | Mino | 24 | 58 | 82 |
| 3. | A Voi 3nak | 16-18/10/2020 | Thantlang | Thantlang | Mino | 15 | 53 | 68 |
| 4. | A Voi 4nak | 20/10/2020 | Thantlang | Tluangrua | 11 | 34 | 45 | |
| 5. | A Voi 5nak | 11-13/11/2020 | Hakha | Bu 17 | Pastor | 5 | 29 | 34 |
| 6. | A Voi 6nak | 16-18/11/2020 | Falam | Falam | Mino | 6 | 12 | 18 |
| 7. | A Voi 7nak | 19-20/11/2020 | Thantlang | Thau | Mino | 7 | 38 | 45 |
| 8. | A Voi 8nak | 21-24/11/2020 | Senthang | Khua 16 | Mino | 18 | 20 | 38 |
| 9. | A Voi 9nak | 26-29/11/2020 | Zophei | Khua 9 | Mino | 17 | 25 | 42 |
| 10. | A Voi 10nak | 04-06/12/2020 | Thantlang | Bu | Pastor | |||
| 11. | A Voi 11nak | 10-12/12/2020 | Zotung, Mara Lautu | |||||
| 12. | A Voi 12nak | |||||||
| 433 |
Chin Reserve hi Chin State chung pengkip le Chin State leng Chin miphun umnak khuakip ummi sianghleiruun siangngakchia le mino hna caah kan tuah tawnmi a si. Dohthlennak rian ah a herhning in an kan bawmtu an si. Tukum cu COVID ruangah peng/khua kip cu kai khawh ding kan si lo. Hakha, Thantlang, Falam le Matupi in sianghleiruun siangngakchia le mino pawl kan auh hna i December thla ah kan tuah lai.
Remdaihnak Rian
Ramkomh Remdaih Tonpumhnak – Kumzabu 21nak Panglong a voi 4nak cu August 19-21, 2020 ah kan tuah. Kumhnih chung Tonpumhnak tuah kho lo in kan um hnu ah kaphnih biakhelnak tete tuah hnu ah atu bantuk in kan tuah khawhmi a si. Federal he pehtlaih in zeimawzat hnatlaknak kan ngei kho. A bik in, 2020 pinlei ah zeitindah kan kalning a si lai timi kha kan ceihmi a si i hnatlaknak kan ngei kho caah lam a awng than.
EAO chung ah biaruahnak cu kan ngei peng. NCA min a thutmi chung lawng si lo in NCA min a thut rih lo mi KIO, KNPP tbk. pawl he zong biaruahnak kan ngei kho. JICM ah siseh, UPDJC ah siseh, JMC-U ah siseh, EAO chungah siseh CNF nih hruaitu dirhmun kan lak lio te a si i fimkhur tein tuan peng a hau.
Forhfialnak
Chinram a him lo ruangah Chin miphun thazaang fun deuh a herh caah peng le tlang sinak kha luanh in Chin miphun pakhat sinak ah dirti ding le miphun sersiam ding in nan umnak hmun in van kan zuampiak cio uh, CNF Tawlrel Bu nih rian tampi kan thlakmi cungah thazaang rak kan chuahpiak cio uh, Chinland Club, UCCF le a dangdang caah fak deuh in van kan zuampiak uh tiah kan in nawl hna. Nan riantuannak cungah chimcawklo lawmhnak kan ngei.
Pathian nih damnak, thawnnak in pe cio sehlaw, nan riantuannak cungah thluachuah in pe chin hna ko seh. Bawipa nih Chinram le Chin miphun thluachuah pe ko seh.
For Chinland & Chin People
Ram Kulh Cung
Assistant General Secretary One
Chin National Front
Ram Kulh Cung
(+95) 09401601524; (+66) 0987942137