Chinland Club chungtel hna le miphun hawi nan dihlak CNF/A nih kum thar lawmhnak kut kan in tlaih hna. Kum thar chung ah thinlung thar, ruahnak thar le thazaang thar he miphun sersiamnak le humhimnak rian ah fek chin in dirtti hna usih tiah kan in sawm tthan hna.
Kan lonh cangmi 2020 cu vawleicung chanbia ah muihnak kum pakhat ah a taang dingmi kum asi ai. COVID-19 zawtnak nih a chuahpimi pulrai le thihnak pin ah pawcawm kawlhawlnak caah siseh, chawkhel rian caah siseh, mi tampi le ram tampi caah khuacimui asi ko.
Miphun dohthlennak mit in kum 2020 cuanh tthan tikah kan vawleipi cu zawtnak nih a chuahpimi harsatnak le zuamcawhnak a phunphun a tuar lioah Khuazing kutcak nih kan miphun a kan huhphenh rih caah lawmhnak he kum thar kan phanh khawh lawng siloin kum khat chung kan miphun dohthlennak lamthluan ah thluachuahnak kan hmuhmi hna rel tthan tikah Bawipa min kan thangtthat ko.
2020 chung ah Chinland Club thawhvo in siseh, UCCF tinhrian (mission) caah siseh, pumpak le chungkhar in chawva, laksawng phunphun, eidin le thilri, thawhlawm, thlacamnak, kan hmunhlum ah tlawng in thazang peknak, tbk, in a lam kip in thazaang chuahtu nan dihlak cung ah kan lunglawmhnak a thar in kan langhter tthan.
Kum 2020 chung ah avoi 7nak CNF Tonpumh (Conference) tlamtling tein kan tuah khawh. Central Committee tonbiaruahnak (meeting), Central Executive Committee meeting voi thum pin ah remdaihnak kallam (peace process) zohtthannak (review) le rian kong caihhmainak pawl zong a herh ning in kan ngei kho. Miphun sersiamnak le humhimnak tlangtar in ruahpumh (workshop) le cawnnak hna zong hmualngei ngai in kan tuah khawh caah a tlamtlinnak ding ah thazang chuahtu nan dihlak cung ah upatnak kut kan in tlaih hna.
Zuamcawhnak tampi lakah vawleipi a tthangcho chin lengmang rih lai, tthanchonak le thlennak zong a rang chinchin lai. 2021 ahhin thil tampi ai thleng lai, kan ruahciami zong a um khawh bantukin kan ruah bal lomi thlennak zong a um kho. Uknak lei le ramkhel rian zong ah thlennak phunphun a chuak ko lai. A um khomi thlennak tampi lakah thilsining le lenglei nih thlenmi sawhsawh siloin kanmah duhmi thlennak kan chuahpi khawhnak ding ah kan dihlak nih timhlamhnak le timhchungnak (planning & preparation) ciammam tein kan ngeih chinchin a herh ko.
2021 cu kan miphun caah a biapi hringhranmi kum asi lai caah miphun dawtu dihlak nih thlacamnak pin ah pekchanh le ttuanrel kum ah hman khawh le nunpi khawh izuam rih hna usihlaw kum thar chung ah miphun sersiamnak le humhimnak tinhrian hna hmualngei chinchin in ttuanchuah izuam chin ding ah kan in sawm tthan hna.
Khuazing Pathian nih kum thar chung ah lam in hruai hna sehlaw Chinland le Chin miphun thluachuah chin ko seh!
Salai Thla Hei
In the middle of every difficulty lies opportunity. Harnak kip lakah hmuhsung a um. Albert Einstein